गणिताच्या विश्वात मराठी ठसा..
गणिताची गोडी लागावी
“विद्यार्थ्यांना गणिताची गोडी लागावी आणि पाढ्यांचे दडपण दूर व्हावे, या उद्देशातून मी ही पद्धत विकसित केली. भारत सरकारच्या पेटंट विभागाकडून ती प्रकाशित केल्याने माझ्या प्रयत्नांचे सार्थक झाले आहे.”
राजेश कोगदे (संशोधक शिक्षक)
खामगाव – बऱ्याचदा शालेय विद्यार्थ्यांना गणिताची भीती वाटते आणि त्याचे मुख्य कारण म्हणजे ‘पाढे’ पाठ करणे. मात्र, बुलढाणा जिल्ह्यातील खामगाव तालुक्यातील कदमापूर जिल्हा परिषद शाळेचे शिक्षक राजेश वासुदेव कोगदे यांनी या समस्येवर एक जादुई उपाय शोधला आहे. त्यांनी विकसित केलेली ‘पाढे तयार करण्याची नाविन्यपूर्ण पद्धती’नुकतीच भारत सरकारच्या पेटंट विभागाकडून प्रकाशित करण्यात आली असून, शिक्षण क्षेत्रात त्यांचे कौतुक होत आहे. या यशाबद्दल सहकारी शिक्षक आणि पालकांकडून त्यांच्यावर अभिनंदनाचा वर्षाव होत आहे.
काय आहे ही पद्धती?
राजेश कोगदे यांनी पाढे केवळ पाठ न करता ते अत्यंत सोप्या आणि रंजक पद्धतीने स्वतः कसे तयार करायचे, याचे तंत्र विकसित केले आहे. ही पद्धत प्राथमिक शाळेतील विद्यार्थ्यांसाठी अत्यंत उपयुक्त असून, यामुळे गणितासारखा कठीण वाटणारा विषय मुलांसाठी खेळ झाला आहे. या पद्धतीचा वापर करून मुले काही सेकंदात मोठे पाढे तयार करू शकतात, ज्यामुळे त्यांचा आत्मविश्वास वाढण्यास मदत होत आहे.
राष्ट्रीय स्तरावर दखल
कोगदे गुरुजींनी शोधलेल्या या पद्धतीची शास्त्रोक्त मांडणी करून त्यांनी पेटंटसाठी अर्ज केला होता. भारत सरकारच्या पेटंट कार्यालयाने त्यांच्या या संशोधनाची दखल घेत ते आपल्या अधिकृत पोर्टलवर प्रकाशित केले आहे. एका जिल्हा परिषद शिक्षकाने राष्ट्रीय दर्जाचे बौद्धिक संपदा (Intellectual Property) अधिकार प्राप्त करणे ही राज्याच्या शिक्षण विभागासाठी मोठी उपलब्धी मानली जात आहे.
शिक्षकी पेशाचा गौरव
आपल्या अध्यापनात सतत नवनवीन प्रयोग करणाऱ्या कोगदे यांनी यापूर्वीही गणित , मराठी आणि इंग्रजी विषयासाठी विविध सोपे उपक्रम राबवले आहेत. त्यांच्या या पेटंटमुळे ग्रामीण भागातील शिक्षकांच्या कल्पकतेला आता राष्ट्रीय स्तरावर ओळख मिळाली आहे.
